YN ystod yr Eisteddfod Genedlaethol, a gynhelir yr wythnos yma, mae tîm Arfordir a Chefn Gwlad Ceredigion wedi trefnu teithiau tywys byr dyddiol o Bentre’ Ceredigion fel bod modd i bobl leol ac ymwelwyr brofi golygfeydd a chefn gwlad prydferth Tregaron wrth fwynhau’r Eisteddfod hirddisgwyliedig yn ein sir.
Bydd y teithiau cerdded ar lwybrau Hawliau Tramwy Cyhoeddus Ceredigion, sy’n darparu un o’r prif ffyrdd i bobl leol a thwristiaid gael mynediad at gefn gwlad a’i fwynhau.
Bydd teithiau tywys yn dechrau am 11am bob dydd o’r ardal bicnic ym Mhentre’ Ceredigion. Cylchdaith o ddwy filltir fydd y teithiau hyn, sy’n mynd i fyny at olygfan sy’n edrych dros y dref a’r Maes. Bydd Cerddwyr yn dychwelyd i’r Maes o fewn 2 awr. Efallai y bydd y rhan i fyny’r allt ychydig yn heriol i rai gan fod 7 camfa i ddringo drostynt, fodd bynnag dylai fod yn addas ar gyfer y rhan fwyaf o gerddwyr.
Mae’n rhaid i aelodau o’r cyhoedd a hoffai ymuno wisgo esgidiau cadarn sy’n addas ar gyfer tir garw a sicrhau bod ganddynt ddŵr yfed wrth law. Mae croeso hefyd i gerddwyr a hoffai ymuno â’r daith gerdded ond nad ydynt yn bwriadu ymweld â’r Maes ymuno â’r daith ym mhrif faes parcio’r dref/y Ganolfan Dreftadaeth am 11:25am.
Yn ogystal â’r teithiau cerdded hyn, ddydd Mawrth 02 Awst, mae taith dywys heriol o 8.5 milltir wedi’i threfnu. Bydd y daith yn cael ei harwain gan un o Geidwaid Hawliau Tramwy Ceredigion sy’n brofiadol iawn ac yn hapus i ateb cwestiynau ynglŷn â rheoli Hawliau Tramwy Cyhoeddus yn ei ardal benodol.
Os hoffech chi ymuno, sicrhewch eich bod yn yr ardal bicnic ym Mhentre’ Ceredigion erbyn 10:50am er mwyn i arweinwyr y teithiau cerdded fynd drwy’r manylion cyn gadael am 11am.
Er mwyn sicrhau diogelwch pawb, ni fydd aelodau o’r cyhoedd nad ydynt wedi gwisgo’n briodol ar gyfer y tywydd neu’r daith gerdded yn cael ymuno. Os ydych chi’n dangos symptomau COVID-19 neu’n teimlo’n sâl, peidiwch â mynychu.
Caiff y teithiau cerdded hyn eu harwain yn rhannol gan wirfoddolwyr, ac felly maent yn amodol ar argaeledd arweinwyr ac yn dibynnu ar Covid.
More Stories
Noson Bocsio Coler Wen yn codi dros £1,000 ar gyfer gwasanaethau nyrsio plant
Yn eisiau! Ffermwr brwd, galluog a chymwys, wedi ymrwymo i ffermio cynaliadwy, ar gyfer cyfle i ffermio cyfran yng Ngorllewin Cymru
Dros 1500 o ffermydd yng Nghymru yn cael cyfran o £161m