MAE’R cyhoeddiad fod Llywodraeth y DU yn gwneud cyfraniad gwerth £30m i gyfleuster profi rheilffyrdd arfaethedig rhwng Castell-nedd Port Talbot a Phowys wedi cael croeso gan ddau gyngor yr ardal.
Y bwriad yw lleoli’r ganolfan ar safle’r cyn-bwll glo brig yn Nant Helen (y safle a ffafrir ar gyfer y trac profi) a golchfa lo gyfagos Onllwyn – sy’n cynnwys ardaloedd awdurdod lleol dau gyngor sir, Powys a Chastell-nedd Port Talbot.
Fe’i cynlluniwyd i arddangos Cymru fel canolbwynt ymchwil a datblygu, ac arweinydd technoleg rheilffyrdd carbon isel. Y syniad yw y bydd y cyfleuster yn cefnogi gweithgynhyrchwyr trenau’r DU gyda’r lle a’r gallu i wneud profion trylwyr ar stoc trenau ac isadeiledd rheilffyrdd, o’r prototeip i’r gweithredu.
Disgrifiwyd cyhoeddi’r arian yn araith Cyllideb y Canghellor Rishi Sunak heddiw (3 Mawrth) fel cam mawr ymlaen i brosiect y Ganolfan Fyd-eang Ragoriaeth Rheilffyrdd gan Arweinydd Cyngor Sir Powys, y Cynghorydd Rosemarie Harris ac Arweinydd Cyngor Castell-nedd Port Talbot, y Cynghorydd Rob Jones.
Yn ôl y Cynghorydd Jones:
“Mae Cyngor Castell-nedd Port Talbot, Llywodraeth Cymru a Chyngor Sir Powys wedi gweithio’n galed gyda phartneriaid yn y sector breifat i yrru’r prosiect hwn ymlaen, ac rydyn ni’n croesawu’n fawr y gefnogaeth ariannol gref hon.
“Os bydd yn derbyn sêl bendith terfynol, bydd y Ganolfan Ragoriaeth Fyd-eang Rheilffyrdd hon creu cyfleuster ymchwil datblygu a phrofi technoleg rheilffyrdd i arwain y byd yma yn ne-orllewin Cymru.
“Bydd yn cynnig cyfle sylweddol ar gyfer twf economaidd yng Nghymoedd de Cymru a thrwy gydol Castell-nedd Port Talbot, a bydd hefyd yn rhoi hwb mawr i swyddi hirdymor o safon uchel, yn ogystal â gwaith adeilad yn ystod y cyfnod adeiladu.
“Edrychwn ymlaen at barhau i weithio gyda Llywodraeth Cymru a’n partneriaid eraill wrth i’r achos busnes uchelgeisiol hwn ddod yn fyw.”
Dywedodd Arweinydd Cyngor Sir Powys, y Cynghorydd Rosemarie Harris:
“Dwi wrth fy modd o glywed y bydd Llywodraeth y DU yn darparu cyllid sylweddol ar gyfer y prosiect arloesol, a fydd yn darparu rhan o becyn cefnogaeth ariannol er mwyn galluogi’r prosiect pwysig hwn ar ffin Powys i fwrw ymlaen.
“Dyma brosiect cyffrous, a byddwn ni’n parhau i weithio ar y cyd â Llywodraeth Cymru a’n cymdogion Cyngor Castell-nedd Port Talbot i symud y prosiect hwn yn ei flaen, er mwyn i’r rhanbarth allu elwa o’r manteision economaidd llawn a ddaw yn sgil y cyfle unigryw hwn.”
More Stories
Noson Bocsio Coler Wen yn codi dros £1,000 ar gyfer gwasanaethau nyrsio plant
Yn eisiau! Ffermwr brwd, galluog a chymwys, wedi ymrwymo i ffermio cynaliadwy, ar gyfer cyfle i ffermio cyfran yng Ngorllewin Cymru
Dros 1500 o ffermydd yng Nghymru yn cael cyfran o £161m