DYNA yw’r cwestiwn gan Heddlu Dyfed-Powys yn ystod wythnos genedlaethol o weithredu ar gyfer mynd i’r afael â throseddau cyllyll.
Mae’r ymgyrch, sef Ymgyrch Sceptre, yn rhedeg o 16 – 22 Medi ac mae’n anelu i gael gwared ar gyllyll a llafnau, ac ar yr un pryd, cynyddu ymwybyddiaeth am beryglon cario cyllyll.
Yn ystod yr wythnos, mae pobl yn cael eu hannog i adael cyllyll diangen mewn biniau amnest mewn gorsafoedd heddlu ledled Sir Gaerfyrddin, Ceredigion, Sir Benfro a Phowys.
Mae’r heddlu hefyd eisiau i bobl wybod sut i gael gwared ar lafnau a chyllyll yn ddiogel y tu allan i’r cyfnod amnest, ac yn annog unrhyw un sy’n gysylltiedig â chliriad tŷ, neu’r rhai a fyddai’n ystyried gadael cyllyll mewn siop elusen, i fynd â nhw i ganolfan ailgylchu yn lle hynny er mwyn cael gwared arnynt yn ddiogel.
Dywedodd Tim Davies, Arolygydd ar gyfer gweithrediadau arbenigol: “Dyfed-Powys yw’r lle mwyaf diogel i fyw a gweithio ynddo, ac ymweld ag ef, o hyd, ac wrth lwc, dydyn ni ddim yn wynebu’r lefel o droseddau cyllyll mae ardaloedd eraill yn gweld. Ar gyfer yr ymgyrch hon, rydyn ni’n newid ein hymagwedd er mwyn canolbwyntio ar gadw cyllyll a allai deithio i ardaloedd eraill allan o ddwylo troseddwyr.
“Gall fod yn anodd gwybod beth yw’r peth iawn i’w wneud â hen gyllell pan rydych chi’n prynu set newydd, neu’n eu hetifeddu gan berthynas. Rydyn ni eisiau i unrhyw un sy’n gysylltiedig â chliriadau tŷ, pobl â pherthnasau oedrannus, a siopau elusen, i wybod eu bod nhw’n medru mynd â chyllyll diangen neu gyllyll maen nhw wedi’u derbyn i’r tip.”
Mae’r heddlu hefyd yn annog ymagwedd synnwyr cyffredin tuag at werthu cyllyll a llafnau, ar ôl iddynt dderbyn llafnau cerdyn credyd yn ystod yr amnest diwethaf ym mis Mawrth 2019.
Pan ymwelodd swyddogion â siop yn Hwlffordd, cyflwynwyd blwch iddynt a oedd yn cynnwys 42 o eitemau plastig du tua maint cerdyn credyd. Wrth agor y cerdyn, datgelwyd llafn cudd yr oedd modd ei gloi mewn lle. Mae’n anghyfreithlon cario cyllyll â llafn y gellir ei gloi, felly cymerodd swyddogion yr eitemau i ffwrdd i gael eu difa.
Dywedodd yr Arolygydd Tim Davies: “Mae’n gyfreithlon gwerthu sawl math o lafn, er bod eu diben yn amheus. Byddwn ni’n gweithio gyda masnachwyr er mwyn trafod y gyfraith, a’r hyn sy’n synhwyrol.
“Byddwn ni hefyd yn gweithio gydag ysgolion, colegau a chlybiau ieuenctid er mwyn atgyfnerthu’r neges am beryglon cario cyllyll ymysg pobl ifainc.
“Mae cario cyllell yn drosedd sydd hefyd yn creu’r perygl ychwanegol y gallai mater bychan dyfu’n rhywbeth llawer mwy difrifol a allai o bosibl newid cwrs bywyd.
“Gall y niwed a achosir gan gyllyll, nid yn unig i’r dioddefwyr a’u teuluoedd, ond hefyd i’r gymuned ehangach, fod yn enbyd. Byddwn yn gwneud pob peth y gallwn i gadw cyllyll allan o’r dwylo anghywir.
“Er nad yw Dyfed-Powys wedi gweld y lefelau uchel o ddigwyddiadau’n gysylltiedig â chyllyll a welwyd gan heddluoedd eraill, byddwn yn cefnogi ein cydweithwyr yn heddluoedd ar draws Prydain drwy gymryd rhan yn Ymgyrch Spectre.
“Mae gan ein heddlu gyfradd troseddu is na’r cyfartaledd cenedlaethol – yn y flwyddyn a ddaeth i ben ym mis Mawrth 2018, bu 31 trosedd yn ymwneud â chyllyll fesul 100,000 o’r boblogaeth yn Nyfed-Powys. Ledled Cymru, mae’r ffigwr hwn yn sefyll ar 37, ac ym Mhrydain, bu 69 o droseddau cyllyll fesul 100,000 o bobl yn ystod yr un cyfnod.”
I gael mwy o wybodaeth ynghylch Ymgyrch Spectre a’r cyfreithiau ynghylch cario cyllyll, ewch at www.dyfed-powys.police.uk.
Galwch heibio i wefan eich cyngor lleol er mwyn dod o hyd i’r ganolfan ailgylchu agosaf:
· Cyngor Sir Gaerfyrddin: https://www.carmarthenshire.gov.wales
· Cyngor Ceredigion: https://www.ceredigion.gov.uk/
· Cyngor Sir Benfro: https://www.pembrokeshire.gov.uk/
· Cyngor Powys: https://www.powys.gov.uk/
Bydd biniau ildio cyllyll yn y gorsafoedd heddlu canlynol rhwng 16 a 22 Medi:
Gorsaf
Oriau Agor
Gorsaf Heddlu Llanelli
Dydd Llun i ddydd Gwener, 9y.b. tan 5y.h.
Gorsaf Heddlu Caerfyrddin
Dydd Llun i ddydd Gwener, 9y.b. tan 5y.h.
Gorsaf Heddlu Rhydaman
Dydd Llun i ddydd Gwener, 8y.b. tan 6y.h.
Dydd Sadwrn a dydd Sul, 9y.b. tan 5y.h.
Gorsaf Heddlu Hwlffordd
Dydd Llun i ddydd Gwener , 8y.b. tan 5y.h.
Dydd Sadwrn a dydd Sul, 9y.b. tan 1y.h.
Gorsaf Doc Penfro
Dydd Llun i ddydd Gwener, 9y.b. tan 5y.h.
Gorsaf Heddlu Aberystwyth
Dydd Llun i ddydd Gwener, 8y.b. tan 6y.h.
Dydd Sadwrn a dydd Sul, 9y.b. tan 5y.h.
(Ar gau o 1y.h. tan 1.40y.h.)
Gorsaf Heddlu Aberystwyth
Dydd Llun i ddydd Gwener, 9y.b. tan 5y.h. (Ar gau o 1y.h. tan 1.40y.h.)
Gorsaf Heddlu Aberhonddu
Dydd Llun i ddydd Sul, 9y.b. tan 5y.h.
Gorsaf Heddlu’r Drenewydd
Dydd Llun i ddydd Gwener, 8y.b. tan 6y.h.
Dydd Sadwrn a dydd Sul, 9y.b. tan 5y.h.
Gorsaf Heddlu Llandrindod
Dydd Llun i ddydd Gwener, 9y.b. tan 5y.h.
More Stories
Noson Bocsio Coler Wen yn codi dros £1,000 ar gyfer gwasanaethau nyrsio plant
Yn eisiau! Ffermwr brwd, galluog a chymwys, wedi ymrwymo i ffermio cynaliadwy, ar gyfer cyfle i ffermio cyfran yng Ngorllewin Cymru
Dros 1500 o ffermydd yng Nghymru yn cael cyfran o £161m