Cabinet Powys ystyried trosglwyddo arian ar gyfer cyfleusterau addysg newydd

FE allai gwaith ar ddatblygu cynlluniau ar gyfer pedwar cyfleuster addysg newydd ym Mhowys symud gam yn nes os bydd y Cabinet yn cymeradwyo cais i drosglwyddo cyllid, dywedodd y cyngor sir.

Bydd y Cabinet yn ystyried y cais ar ddydd Mawrth 18 Mai.

Mae Cyngor Sir Powys am ddatblygu cyfleusterau newydd fel rhan o gynlluniau uchelgeisiol i drawsnewid addysg ym Mhowys, gan ddarparu cyfleusterau haeddiannol o’r radd flaenaf i ddysgwyr.

Fel rhan o’r cynlluniau, mae’r cyngor am ddechrau gwaith dichonoldeb a gwaith dylunio cysyniadau i’r cynlluniau canlynol:

Cyfleusterau newydd ar safle Ysgol Calon Cymru – Campws Llandrindod;

Campws newydd ar gyfer Ysgol Uwchradd Gwernyfed;

Ysgol gynradd ddwy ffrwd newydd ym Mhontsenni yn lle’r hen adeilad; a hefyd,

Campws newydd ar safle hen Ysgol Uwchradd Aberhonddu a allai gynnwys ysgol newydd, uned atgyfeirio disgyblion a phwll nofio.

Er mwyn dechrau ar y gwaith dichonoldeb a’r gwaith dylunio cysyniadau i’r pedwar cynllun, gofynnir i’r Cabinet gymeradwyo cais i drosglwyddo £1.15m i ariannu’r gwaith hwn.

Dywedodd y Cynghorydd Phyl Davies, Aelod Cabinet ar faterion Addysg ac Eiddo:

“Un o nodau Gwelediaeth 2025 yw cynnig amgylcheddau addysgu a dysgu o’r safon orau a bydd ein Strategaeth ar gyfer Trawsnewid Addysg ym Mhowys yn ein helpu ni wireddu hyn.

“Rydym am gynnig y cyfleusterau gorau i’n dysgwyr, eu teuluoedd a’r gymuned ehangach a thrwy’r cynlluniau hyn, bydd yn ein helpu ni gyflawni hyn.

“Mae gwaith dichonoldeb a dylunio cysyniadau’r cynlluniau hyn yn hanfodol, nid yn unig i gael manylion mwy cywir i’r cyngor o gostau’r prosiect, ond hefyd i ddatblygu achos busnes er mwyn denu arian ychwanegol gan Lywodraeth Cymru.  Ni fydd yr astudiaethau dichonoldeb hyn yn effeithio ar ganlyniad unrhyw gynigion i ad-drefnu ysgolion.

“Rwy’n argymell i’r Cabinet eu bod yn cymeradwyo’r cais i drosglwyddo cyllid ar gyfer y pedwar cynllun hwn er mwyn dechrau’r gwaith dichonoldeb a dylunio cysyniadau a gallu bwrw ‘mlaen gyda’r rhaglen gyffrous i Drawsnewid Addysg.”